KALIBO, Aklan—Nag-arangkada eon ro pre-registration it passport on wheels (POW) nga haead it lokal nga gobyerno it Kalibo sa mga pumueoyo.
Suno kay John Marden Maigue, manager it Public Employment Services Office ukon PESO-Kalibo, raya hay eksklusibong makabenepisyo ro mga kalibonhon partikular sa mga first timer nga magbueo it passport ag sa mga naga-renew it nasambit nga dokumento.
Kapin sa 1,800 slots ro gin-alokar it Department of Foreign Affairs ukon DFA-Iloilo kon siin sanda mismo ro magaadto iya sa banwa it Kalibo para iproseso ro dokumento.
Ginpaathag ni Maigue nga raya hay first come first serve basis kon siin nag-umpisa ro pre-registration ko Mayo 17 ag magatapos hasta sa adlaw it Biyernes, Mayo 20.
Samtang, ro pagproseso it DFA hay maga-umpisa sa Mayo 30 hasta it Hunyo 1.
Ro gusto nga mag-avail it daya nga serbisyo hay magdaea eamang it valid identification card kamana man live birth nga maghalin sa Philippine Statistics Authority ukon PSA.
Sa pihak kara, uwa man ginabaton ro mga aplikante nga nadueaan it passport ag iba pa.
