KALIBO, Aklan — Ginabasoe makaron it sangka mister ro anang pagkahueog sa stretcher bilang rason it pag-angkon it permanent disability sa waea nga parte it anang uyahon kat ginahana imaw nga ipasakay sa ambulansiya sa parte it Jaime Cardinal Sin Avenue sa Brgy. Andagao, Kalibo.
Ginsaysay sa Bombo Radyo Kalibo it 45 anyos nga si Marcelle Philip Mirto Torres nga agahon it Biyernes, April 4, 2025, magapa-agto kunta imaw sa Kalibo Shopping Center kat gulpi nga nakabatyag it pagbuyog it ueo bangud sa grabeng kainit it tiempo.
Dugang pa nana nga may highblood imaw ag may gina-inom nga mga bueong.
Ginbuligan raya it mga rescuers it nag-agi nga ambulansiya it MDRRMO-New Washington agud kunta nga daehon sa Aklan Provincial Hospital, apang aksidenteng nahueog halin sa hasta sa hawak ukon “above waistline” nga kataason it stretcher.
Owa sigon imaw it alintro kat matabu ro insidente ag sa mga video eamang nga ginpost sa social media nakita ro natabu kana.
Nabugtaw sigon imaw nga idtu eon sa emergency room it ospital.
Nakita nana ro madasig nga paghueag it mga rescuers nga nagbulig kana, apang bangud nga owa imaw naka-strap rason nga nahueog ag eumampos ro anang uyahon sa sementado nga karsada nga naging rason it paghaeok nga hasta sa makaron hay anang ginabatyag.
Sa findings it anang doktor, nakaangkon it damage ro pilang nerves sa anang uyahon rason nga nagamanhid.
Nagpangayo sigon imaw it financial assistance sa LGU-New Washington para sa anang pagpabueong, therapy ag mga gina-inom nga bueong, apang ginapasabat anay sigon kana ro gastos bangud nga indi pa sanda makapaguwa it pondo tuga it election banning.
Sa makaron hay ginatinguhaan it Bombo Radyo Kalibo nga maboe-an it pahayag ro LGU New Washington angot sa ginpaabot nga reklamo ni Mr. Torres.
Nasayuran nga may ginhatud nga pasyente ro ambulansiya it MDRRMO New Washington ko rato nga tiempo ag nakataeana eon kunta nga magabalik sa andang opisina kat maagyan nanda ro insidente.
Apela nana nga ipaidaeum it mayad sa nagakaigo nga training ro mga rescuers it mga MDRRMOs agud nga malikawan ro kapalkanan nga posibleng ikapahamak it mga pasyente.
