KALIBO, Aklan – – – Natumod eon it otoridad ro identification it patay nga eawas it sangka eaeaki nga nauna eon nga nasapwan nga naga hamyangon maeapit sa Malinao Parish Church.
Nakilaea rayang si Jerry David, 50 anyos ag sangka barangay kagawad it Brgy. Malandayon, Malinao.
Sa exclusive interview it Bombo Radyo Kalibo sa akolito nga si John Laurence Suante, 16 anyos, nga samtang nagapaguwa imaw sa kombento matapos nga ginpreparar ro mga kagamitan sa misa takna alas 3:45 kaina, napan-uhan kara ro biktima nga nagahamyangon ag duguan ro pursyon it ueo.
May nina sigon ro eaeaki sa anang dahi, naga mukeat ro mata kamana man nga mapuea ro anang tiyan ag may maea nga dugo sa parte it anang mata.
Suno pa kay Suante nga bukon imaw it familiar sa itsura it nasambitan nga eaeaki.
Owa man suno kana imaw it nabatian nga nakaangkon it komosyon antes nga masapwan ro biktima.
Insigida man sigon nga nagtawag sanda it kapulisan matapos nga gin impormahan ro andang kura paruko.
Sa makaron hay naga padayun pa ro imbestigasyon it kapulisan sa naging rason it kamatayun it nasambitan nga barangay kagawad.
