KALIBO, Aklan—Nagapadayun pa ro imbestigasyon it mga otoridad kasunod it nakit-an nga patay nga eawas it sangka babaye sa suba nga sakop it Brgy. San Jose, Ibajay.
Suno kay Police Corporal Demark Kiel it Ibajay Police Station, ro biktima hay sangka 32-anyos nga babaye, sangka special child ag residente it Sitio Agbaliw, sa nasambit nga barangay.
Sa anda sigon nga pagresponde sa lugar nakit-an nanda nga nakahapa sa tubi ro patay nga eawas it biktima ag owa raya it suksok pang idaeom.
Ginpahayag dugang nga ap-at ka mga unga nga nagapaligos sa lugar ro unang nakakita sa bangkay.
Nagrequest eon man sigon sanda it SOCO para magproseso sa crime scene kamana man nga ginpaidaeom sa physical examination ro eawas it biktima kung siin owa man it nakita nga lastro sa eawas kara.
Samtang, narecover man maeapit sa lugar ro pila ka mga gamit it biktima nga ginakaeakipan it tsinelas, short ag underwear.
Nakataeana man nga ipaidaeom sa autopsy ro patay nga eawas it nasambit nga biktima.
