KALIBO, Aklan—Agud nga malikawan ro disgrasya sa mga nagapangunang karsadahon sa bilog nga probinsya it Aklan, mas pang gin-ayos it Department of Public Works and Highways ukon DPWH ro andang trabaho.
Raya hay kasunod sa pagtapos it patching of potholes nga makabig nga takaw-aksidente sa mga motorista.
Suno kay Engr. Joey Ureta, head it maintenance section it DPWH Aklan nga ginpaidaeom eon sa evaluation ro andang trabaho kon sa siin raya ro andang ginprayoridad sa 25% nga pondo nga andang nabaton sa raya nga dag-on.
Sa pihak kara, nagapadayon ro re-blocking ag rehabilitation it national highway maghalin sa banwa it Balete paadto it Altavas bangud nga halin sa dating 20 centimeter nga damoe it semento sa karsada hay mas pa raya nga gindamuean nga nagaabot eon makaron sa 30 centimeter.
Nasayuran nga manipis ro mga unang ginconstruct nga karsada nga uwa nagabuhay sa mga loaded ag daeagkuan nga klase it saeakyan rason nga mas pa raya nga gindamuean ag raya sa makaron ro nagapadayon nga proyekto sa nasambit nga lugar.
