NATIONAL News — Hugut nga gina-monitor it Bureau of Fisheries and Aquatic Resources (BFAR) sa Bicol ro mga baealigyaan ag fish landing sites sa rehiyon matapos makumpirma it mga awtoridad ro pagbaligya it pating sa Matnog, Sorsogon.
Gin-inspeksyon it BFAR Bicol ro nasambit nga baealigyaan kun sa siin gina-alegar nga ginabaligya ro mga pating.
Ginkumpirma it ahensya nga ginabaligya sa merkado ro Coral Catsharks ag Whitetip Reef Sharks.
Klasipikado ro Whitetip Reef Shark bilang vulnerable species ag protektado sa idaeum it RA 10654 ag international conventions bangud sa naganaba kara nga populasyon.
Mag-eowas sa ginpabaskog nga monitoring sa mga baealigyaan ag fish landing sites, magapaguwa man it educational materials ro BFAR agud nga abisuhan ro mga nagabaligya ag ro publiko sa mga ginabawae nga species.
Ro sin-o man nga madakpan nga nagabaligya, nagabakae ukon nagabiyahe it protected species hay magapangatubang sa multang P300,000 hasta P1 milyon ag pagkakulong nga halin lima hasta waeong dag-on.
