KALIBO, Aklan — Nagapangatubang sa patong-patong nga kaso ro Cebu-based personality nga si Jude Bacalso nga ginpasaka it sangka waiter nga ginpatindog nana it mabuhay nga inoras sa anang prente bangud sa pagtawag kana nga “sir” sa sangka restaurant sa Cebu City mall ko nagtaliwan nga Hulyo 21.
Ro insidente nga naboe-an it video hay nagtuga it kontrobersiya online.
Waea-tuo man nga batikos ro nabaton ni Bacalso halin sa mga netizens.
Ro mga kasong ginpasaka kontra kana hay ginaeakipan it Unjust Vexation, Grave Scandal, Grave Coercion, Grave Threats, ag Slight Illegal Detention sa Cebu City Prosecutor’s Office, adlaw it Miyerkules, Agosto 28.
Ginpahayag ni Atty. Ron Ivan Gingoyon nga naga-representar sa waiter nga ro anang kliyente sigon hay naghalin sa anang trabaho matapos nga ma-trauma ag nakabatyag nga bukon eon imaw it komportable nga magtrabaho sa nasambit nga restaurant.
Padayun sigon nga apektado it trauma ro waiter bangud sa insidente ag mas ginpili nga itago ro anang itsura kon nagaguwa sa pampublikong lugar.
