Nagpasaka eon it kasong kriminal ro mga awtoridad kontra sa 15-anyos nga child in conflict with the law (CICL) nga eakot sa madugong pagpamaril sa sangka pampublikong eskwelahan sa Tacloban City nga ginkamatay it tatlong estudyante ag ginkanina it maabu nga iba pa.
Suno kay Police Lieutenant Colonel Analiza Armeza, hepe it Public Information Office it Police Regional Office 8 (PRO 8), ginpasaka ro reklamo sa Prosecutor’s Office, gabi-i it Martes, Hunyo 23.
Ro 15-anyos nga CICL hay sambilog sa daywang estudyanteng sa kustodiya it mga awtoridad matapos ro pagpamaril sa San Jose National High School sa Barangay San Jose ko Hunyo 22. Ro sambilog pang eakot hay 14-anyos.
Ginpahayag ni Armeza nga kaibahan sa mga anggulong gina-usisa sa imbestigasyon hay ro gina alegar nga bullying, apang una sa hurisdiksiyon eon it Prosecutor’s Office ro pagtumod sa motibo it krimen.
Ginkumpirma man it kapulisan nga naka-istorya eon nanda ro babayeng pulis nga nagapanag-iya it baril nga gina-alegar nga gingamit sa insidente. Presente raya nga una sa restrictive custody, ginkakas sa anang designation, ag nagapaidaeum sa administrative investigation.
Na-turn over eon man sa City Social Welfare and Development Office it Tacloban City ro daywang menor de edad nga eakot sa insidente. Suno sa kapulisan, una eon sa stable condition ro mga naninahan nga biktima.
Ginatun-an eon man it mga awtoridad ro posibilidad nga magpasaka it kaso kontra sa mga ginikanan it mga menor de edad. Kadungan kara, ginpabaskog it PNP ro police presence, foot patrols, ag koordinasyon sa mga eskwelahan, PTA, ag mga lokal nga opisyal agud nga malikawan ro kaparehong insidente.
