KALIBO, Aklan — Sangka nagaka-agnas eon nga pawikan ukon sea turtle ro nakita it pilang residente sa bibi it baybayon bandang alas-6:40 agahon it Domingo, Abril 6 sa Brgy. Pook, Kalibo.
Insigidang ginpahisayod sa mga opisyal it barangay ro nakitang pawikan nga sangka babaye nga ginaboeobanta nga may bug-at nga 150 kilos agud nga mausisa raya ag masayuran kon ano ro dapat nga obrahon.
Nakita nga may crack sa likod it pawikan.
Dayun man nga gin-eubong ro nasambit nga pawikan sa lugar makataliwan ro pilang oras it Pook Barangay Council ag Kalibo Bantay Dagat.
Ginpahayag nga umpisa ko Pebrero 2025, raya eon ro pang-limang kahigayunan nga may nakitang patay nga pawikan sa nasambit nga lugar.
Bangud kara, nagpaandam ro Bureau of Fisheries and Aquatic Resources (BFAR 6) ag Provincial Environment and Natural Resources Office (PENRO-Aklan) nga hugut nga ginabawae ro pagpatay ag pagdakop sa mga pawikan bangud nga ginakabig sanda nga “critically endangered” .
