KALIBO, Aklan — Mabahoe ro pagpati ni Kabataan Party-list Representative Renee Co nga maisapinal eon sa Nobyembre 2026 ro Pax Silica framework agreement sa tunga it Pilipinas ag Estados Unidos, nga ginaeauman nga matalakay sa pagbisita ni US President Donald Trump sa nasyon sa tiempo it ASEAN Summit.
Suno kay Co sa anang personal nga pagbisita sa broadcast center it Bombo Radyo Kalibo, kontra ro andang partido sa proyekto bangud sa pagkabaeaka nga magatuga raya it mabahoe nga epekto sa suplay it tubi ag kuryente sa Luzon, pagkasamad it dunang manggad, ag pagkaduea it eugta it mga mangunguma ag katutubong Dumagat.
Ginmitlang man it mamalidha ro planong pagmina it high-purity silica sand ag quartz sa parte it New Clark City, nga suno kana hay pwedeng gamiton sa pag-obra it mga kagamitang kinahangean it militar it Estados Unidos.
Ginpamilit pa ni Co, sa baylo nga pondohan ro edukasyon, lokal nga industriya ag mga nagapangunang serbisyong pangsosyudad, dapat sigon nga unahon it gobyerno ro kamaeayran it mga Pilipino.
