Igapatigayon makaron nga adlaw, Abril 16 sa Kalibo Pilot Elementary School ro pay-out it cash assistance maghalin sa Department of Social Welfare Development ukon DSWD para sa mga tricycle driver it banwa it Kalibo nga apektado it oil crisis.
Suno kay Kalibo TODA Federation president Romeo Duque Tubalinal Jr., ro mga makabaton eamang it nasambit nga ayuda hay ro mga lehitimong driver nga nakarehistro ag miyembro it nasakupan nandang Tricycle Operators and Drivers Association ukon TODA.
Mag-eowas kara, kinahang-ean nga may professional drivers license nga ginabuytan ag personal sigon nga igarelease kanda ro nasambit nga cash assistance.
Sa pihak kara, may mga tricycle drivers ro nagpaabot it sintemyento bangud nga uwa nakaibahan ro andang pangaean sa listahan nga sambilog man sanda sa mga apektado it mataas nga presyo it langis.
Bangud kara, ginpaathag ni Tubalinal nga kato pa man hay gin-abisuhan eon nana ro mga kaparehong driver nga magpamiyembro ag magparehistro sa nasakupan nanda nga TODA agud nga maskin siin sanda maadto hay magapabilin nga aktibo ro andang pangaean sa listahan ag insigidang maeakip sa mga benepisyo nga ginatao it gobyerno kaparehas makaron sa ayuda nga P5,000 pesos nga igapanupod kanda it tigsambilog it DSWD.
