Nagapadayun ro pagpanupod it Cash Relief Assistance para sa mga miyembro it Tricycle Operators and Drivers’ Associations (TODA) sa banwa it Kalibo.
Personal nga ginpangunahan ni Assistant Regional Director for Operations Katherine Joy Lamprea it DSWD Field Office VI ro pag-arangkada it nasambit nga aktibidad.
Tuyo kara nga masiguro ro maayos, madasig ag organisadong sistema it distribusyon para sa mga benepisyaryo.
Target it payout nga mataw-an ro dugang nga 2,389 nga miyembro it TODA sa Kalibo.
Kada isaea kanda hay makabaton it ₱5,000 nga bulig pinansyal halin sa gobyerno.
Ro nasambit nga pondo hay gintaeana agud nga magsirbing dugang nga bulig agud nga mapahagan-hagan ro kalisod nga nabatyagan sa padayun nga pagtaas it presyo it produktong petrolyo.
Ro nasambit nga inisyatibo hay kaparte it direktiba nanday Pangueong Ferdinand Marcos Jr. ag DSWD Secretary Rex Gatchalian.
Tuyo it programa nga maghatud it sangkiri nga kasoehayan halin sa mga gastos sa sektor it transportasyon nga direktang apektado it krisis sa gasolina.
