NATIONAL News — Nag-surender eon sa mga otoridad si PBA player John Amores matapos nga barilon ro anang kontra sa basketball sa Lumban, Laguna Miyerkules nga adlaw, Septyembre 25.
Kaibahan ro anang igmanghud nga eaeaki, nag-surrender si Amores bandang alas-2:00 it aga-aga it Huwebes, Septyembre 26.
Nagpamalibad eon ro nasambit nga basketbolista nga magtau it anuman nga pahayag angot sa natabu nga shooting incident.
Nagapangatubang si Amores sa reklamo nga attempted murder ag igapaidaeum sa inquest proceeding makaron nga adlaw.
Madumduman nga nakaangkon it owa pagka-ilintindihan si Amores sa biktimang si Lee Cacalda sa sangka hampang sa basketball sa Barangay Salac sa nasambit nga lugar.
Nagkasugot ro daywa nga magguwa hasta nga ginsundan it biktima ro suspek sa Barangay Maytalang Uno.
Matapos ro pagpanaog nanda sa motorsiklo hay gulping ginbaril it suspek ro biktima gamit ro indi masayuran nga kalibre it baril.
Maswerteng owa tinamaan ro biktima samtang nagpaeagiw ro basketbolista.
