Ginabantayan kon ano nga mga programa ag pagbag-o ro igapatuman ni Pangueong Ferdinand Marcos Jr. bukon eamang sa bilog nga nasyon kundi maging sa Department of Agriculture (DA) kun sa siin temporaryo man imaw nga magapungko nga sekretaryo.
Medyu maabu ro dapat nga bag-uhon sa ahensya rason nga personal raya nga pagadumaeahan it Pangueo.
Antes pa man ro inagurasyon ni marcos, medyu nakabaton eon imaw it mga report angot sa nagakatabu sa ahensya.
I-eakip pa kara ro nabulgar sa Senate committee report angot sa pilang opisyal it DA kaibahan ro pilang opisyal it Bureau of Customs (BOC) nga ginasugid nga nadaeahig sa smuggling.
Ginsumite eon it Senado sa Ombudsman ro ‘smugglers list’ nga naghalin sigon sa intelligence committee.
Nauna eon nga ginpahayag it pangueo nga tuyo man nana nga pahauman ro naka-abang nga food crisis sa nasyon.
Posibleng nakikita ni Marcos nga magiging grabe ro problema rason nga kinahangean nana raya nga matutukan ag indi anay itugyan sa iba.
Madumduman nga namitlang ni Marcos sa tiempo it kampanya ro anang handum nga mapanaba sa P20 pesos ro kada kilo it bugas.
Maabu man ro nag-alsa it kilay kara.
Makaron nga imaw mismo ro nagpungko sa DA, mabahoe ro chansa nga mapabaskog ro agrikultura.
Ag mas mayad kon mas mapanaba ro presyo it bugas maskin nga bukon eon it 20 pesos basta nga makatuga it kasoehayan sa mga pamilyang pinoy hay ok eon.
Hueaton naton ro mga magiging pagbag-o sa mga programa ag kalakaran sa DA sa masunod nga mga inadlaw kun sa siin ro mismong Pangulo eon it nasyon ro magiging hepe.
