Ginmandu ni Pangueong Ferdinand Marcos, Jr sa law enforcement agencies nga tugison ro mga drug sindicates sa pihak nga minor offenders eamang.
Raya ro ginpahayag ni Justice Secretary Jesus Crispin Remulla sa sidelines it ika-52 session it United Nations Human Rights Council sa Geneva.
Suno kay Remulla sa gin-organisang panel discussion angot sa prison ag justice sector reforms ag human rights nga andang maid-id nga gintan-aw ro mga polisiya kontra sa iligal nga droga.
Suno kana ro droga ro ugat it pagkapariwara it mga Pilipinong nagagamit kara rason nga andang pagatumuron ro sources ukon sa likod it pag-eapnaag it iligal nga droga sa pihak nga street-level minor players nga kaeabanan man hay mga biktima malang man.
Pag-abot man sa sigon sa status it justice ag penal system it Pilipinas, nasayuran it gobyerno ro problema it nasyon kaeakip ro overpopulation sa mga kulungan ag iba pang detention facilities it nasyon.
Pila sa mga ginapatuman nga solusyon kara it DOJ hay ro digitalisasyon it single prisoner record, deployment it state lawyers para mahimay ro mga kaso it mga preso para sa inisigida nga kahilwayan ag humanitarian releases sa mga magueang eon ag mga may grabe nga baeatian nga persons deprived of liberty.
Nakataeana man sigon mag-isyu ro justice department it bag-ong sueundanan sa case build-up kadungan kara hay pagahinyuon man sa prosecutors nga irekomenda ro pagpanaba it piyansa para sa mga pobre nga preso.
