Pilang adlaw eon lang antes ro anang retirement sa masunod nga domingo, nagtau eon it anang pahayag si PNP chief Gen. Rodolfo Azurin Jr. angot sa kontrobersiyang ginakaeakutan it pilang mataas nga opisyal it command ag mga tawuhan kara nga may kaangtanan sa 990 kilos it shabu nga narekober kay P/MSgt. Rodolfo Mayo.
Mabahoe nga sangag ro gintuga it nasambit nga drug operations nga imbes nga mabahoe nga accomplishment sa PNP hay namantsahan it kontrobersiya.
Eabi pa ag gulping nagpahayag si Secretary Benhur Abalos, nga may natabu nga cover-up sa drug operation kadungan sa pagtumod sa pilang mataas nga opisyal ag mga tauhan it PDEG ukon Police Drug Enforcement Group ro eakot kara.
Suno kay Abalos, may natabu nga ‘cover-up’, apang gin insister ni Azurin nga owa it ‘cover-up’.
Posible sigon nga nataw-an it saea nga impormasyon’ ro DILG secretary.
Madaeum man ro naging pahayag it PNP chief nga naka istorya eon nana si Pangueong Ferdinand Marcos Jr., angot sa kontrobersiya ag sa gin obra ag ginapatigayon nga imbestigasyon it ginbilog nga SITG.
Nagapati si Azurin nga gin obra sigon raya it sindikato sa droga ro mga pamaagi agud nga guluhon ro ginapatigayon nga imbestigasyon.
Mabahoe nga paealigban man ro naging paandam kara sa Pangueo nga ginapadahan sa pagpili it masunod nga PNP chief.
Ginmitlang pa ni Azurin nga dapat ro ibaylo kana hay mas instrikto.
Nauna eon nga nagtuhaw nga may mga owa pagka ilintindihan sanday Azurin ag Abalos nga bangud kara hay nabutang sa aeang aeang nga sitwasyon ro command.
May ginarekomendang next PNP chief si Abalos, nakataeana man nga magtau it anang rekomendasyon si Azurin.
Sa ulihi, ro pangueo gihapon ro may ‘say’ kara kun sin-o ro anang igabutang.
Ro gina-abangan it mga ‘Maritess’ hay kun sin-o ro mapili , ro ginrekomenda baea ni Abalos ukon kay Azurin ukon iba pang mapilian it Pangueo.
Raya ro paga abangan it kaabuan .
