Nagbabala si Pangulong Ferdinand R. Marcos Jr. laban sa mga posibleng “walang silbing” insertions o dagdag na pondo sa panukalang PHP6.793-trilyong national budget para sa 2026 — ang pinakamataas sa kasaysayan ng bansa.
Ayon kay Palace Press Officer Claire Castro, tiniyak ng Pangulo na maingat na binalangkas ang National Expenditure Program (NEP) katuwang ang kanyang Gabinete, kaya’t anumang paglihis sa mga prayoridad ng administrasyon ay maaaring i-veto o tutulan ng Pangulo.
Binanggit ni Castro na bukas si Marcos sa publikong pagtalakay ng bicameral budget deliberations upang matiyak ang kalinisan ng pondo. Giit niya, hindi dapat abusuhin ng Kongreso ang “power of the purse” sa pamamagitan ng paglalagay ng hindi kapaki-pakinabang na probisyon.
Samantala, sinabi ni Budget Secretary Amenah Pangandaman na posibleng maantala ang pagpapatupad ng mga programa at proyekto kung babaguhin ang NEP, na nagsisilbing batayan ng General Appropriations Bill (GAB).
Sa kanyang ika-apat na State of the Nation Address (SONA), iginiit ni Marcos na kanyang i-veto ang GAB kung hindi ito naaayon sa NEP.
Layon ng 2026 budget na suportahan ang mga pangunahing programa ng pamahalaan sa edukasyon, imprastruktura, digitalisasyon, kalusugan, at serbisyong panlipunan.
