Gin-engganyo ni Pangueong Ferdinand Marcos Jr. ro mga sundalo nga magpabilin nga nagapokus sa andang misyon sa pihak it mga kaguluhan ag sangag sa palibot eabi eun sa isyu it pulitika.
Ginhimo ni PBBM ro pahayag matapos bumisita sa Southern Luzon Command (SOLCOM) sa Camp General Guillermo Nakar sa probinsiya it Quezon kahapon nga adlaw.
Ginpadumdom it Pangueo nga ro trabaho it mga sundalo hay ipabilin ro katawhayan ag proteksyunan ro pumueoyo.
Samtang ro misyon it Pangueo hay panamion ro Pilipinas ag bukon it para makipag-away sa uwa it pueos nga butang.
Ginpamilit man it Presidente nga sambilog ro misyon it tanan ag raya hay proteksyunan ro pumueoyo ag ro Republika ng Pilipinas.
Ginsiguro man ni PBBM sa mga sundalo ro bilog nga suporta sa administrasyon sa AFP, PNP, ag sa tanan nga nagatrabaho sa idaeom it SOLCOM.
Ginpasaeamatan man ni Pangueong Marcos ro mga sundalo sa andang dedikasyon ag serbisyo sa nasyon kun siin gin-engganyo man sanda nga padayunon ro andang mayad nga trabaho para sa mas euwas progresibong Pilipinas.
Ginpamilit ni Pangueong Marcos Jr. ro kinahangeanon sa paghiliugyon.
Raya hay agud siguraduhon ro katawhayan, seguridad, ag kaeuwasan it mga pumueoyo ag teritoryo it Pilipinas.
Gindayaw man it Pangueo ro espesyal nga kontribusyon it mga sundalo, eabi eun ro andang madasig ag epektibong pagsabat sa an-om nga grabeng bagyo nga nag-agi sa nasyon sa sueod eamang it 23 diyas.
Ginpunto pa ni Pangueong Marcos nga bangud sa mayad nga trabaho it mga awtoridad, ginakilaea makaron ro Pilipinas bilang eksperto sa disaster response.
Suno kana nga pagpakita man raya sa pihak it limitadong resources, kayang maging madinaeag-on it nasyon kontra sa hangkat it kalikasan.
