Sa pagselebrar it Araw ng Kagitingan kahapon nga adlaw it Dominggo, Abril 9,2023, ginpanawagan ni Pangueong Ferdinand Marcos Jr. nga magpahayag kontra sa diskriminasyon, magbulig sa mga nagakinahangaean ag magtinguha para sa sangka mas manami nga bwas damlag.
Gin-engganyo it pangueo ro mga Pilipino nga magtinguha para sa pagbilog it sangka makatawo, patas, ag progresibong lipunan nga nagatugyan sa andang mga kababayan nga maging masadya sa kahilwayan ag maangkon ro andang mga indibidwal ag kolektibong ginahandom.
Ro Araw ng Kagitingan hay ginaselebrar bilang pagpasidungog sa mga Pilipinong nakipagsukoe sa mga suldadong Hapones ko Ikaywang giyerang pangkalibutan.
Raya man hay ginadumdum ro pagkapiyerdi it Bataan sa mga hukbong Hapones ko Abril 9, 1942.
Samtang, dag-onang ginaselebrar ro Araw ng Kagitingan kada Abril 9, gindeklara it Malacañang makaron nga adlaw it Lunes, Abril 10, 2023, hay sangka regular nga holiday bilang pagdumdum sa Araw ng Kagitingan para taw-an ro mga Pilipino it mas mahabang weekend mag-eowas sa Semana Santa umpisa Abril 6 hasta Abril-9.
