KALIBO, Aklan—Nagaapela makaron ro mga negosyante sa Department of Tourism (DoT) nga tun-an eon ro carrying capacity sa Boracay kasunod sa mga infrastructure improvements nga ginhimo it gobyerno sa isla.
Sa sueat nga ginpadaea it Philippine Chamber of Commerce and Industry-Boracay (PCCI-Boracay) kay Tourism Secretary Bernadette Romulo Puyat at Regional Director for Western Visayas Cristine C. Mansiñares, ginpahayag it mga raya nga kinahang-ean ikonsidera it Boracay Inter Agency Task Force nga pwede eon man dugangan ro numero it mga turista nga batunon sa isla bangud sa improvements nga ginhimo kara.
Halin kat ginbuksan it uman ro Boracay ko October 25, 2018 ag sa mga presenteng dag-on, mas pang nag-eapad ag naghaeoga sigon ro mga karsada ag gin-ayos ro sewerage system kamana man ro water quality it dagat.
Ro mga hotels ag iba pang establisyimento hay nakahimo eon man it kaugalingong sewerage treatment plants samtang ro mga edipisyo hay naka-comply sa naging mandato it task force rason nga nagakabagay sigon nga dugangan ro numero it mga bakasyunista nga puwedeng tumabok sa isla.
Dapat sigon nga ikonsidera ro mga bagay ngara para amat-amat nga mabuhi ro industriya it turismo sa probinsya nga naeogmok it husto bangud sa nagtaliwan nga pandemya.
Madumduman nga ginbatikos it DoT ro lokal nga gobyerno it Malay bangud sa uwa nabantayan it mga raya ro pagsueod it mga turista ko holiday break kon siin, umabot sa masobra 22,000 ro mga turistang nagsueod sa Boracay sa pihak it gintaeanang carrying capacity nga hasta it 19,215 eamang.
