KALIBO, Aklan—Hugut nga seguridad ro ginapatuman it Philippine Coast Guard ukon PCG-Aklan sa pag-abot it pilang Association of Southeast Asian Nations ukon ASEAN ambassadors para sa tatlong adlaw nga International Business Forum and Diplomatic Visit sa Isla it Boracay.
Suno kay Lt. Junior Grade John Laurence Banzuela, station commander it PCG-Aklan nga halin sa Caticlan jetty port hasta sa Cagban jetty port hay nakakalhit ro andang mga tawuhan ag k-9 units agud nga masiguro ro eowas ag maayos nga sitwasyon sa mga baybayon sa palibot it isla sa tiempo it andang pagbisita.
Mag-eowas sa pagpatrolya ag pag-escort it andang mga floating assets hay nagpatigayon man sanda it baywatch patrol sa beach front maeapit sa ginahiwatan it event.
Tuyo it nasambit nga aktibidad nga mapabaskog ag mapromote ro economic and tourism partnerships.
Ro nasambit nga mga ambassadors hay naghalin sa Malaysia, Brunei, Indonesia, Vietnam, Cambodia, Laos, Pakistan, ag Taiwan.
Ro nakataeanang forum hay magatau it platform para sa mga diplomats, business leaders, stakeholders, ag local government officials agud nga matalakay ro pilang oportunidad para sa collaboration, digital marketing, ag sustainable tourism sa Boracay.
Nauna eon nga ginkumpirma it lokal nga gobyerno it Malay nga sanda mismo ro nag-imbita sa nasambit nga mga ambassadors nga insigida man nga nagpa-hu-o .
