KALIBO, Aklan–Ginpasiguro it Philippine Coast Guard ukon PCG-Aklan nga 24/7 sanda nga nakabantay sa mga pantalan kadungan it ginaeauman nga pagbuhos it mga pasahero nga magabakasyon sa isla it Boracay ag maga-uli sa andang natungdan nga probinsiya sa pagdumdum it Semana Santa.
Suno kay Senior Chief Petty Officer Dominador Salvino, Deputy Station Manager for Operations it PCG-Aklan nga raya hay kasunod it ginpaguwa nga memorandum halin sa national headquarters angot sa implementasyon it Oplan Ligtas Biyahe Semana Santa makaron nga dag-on.
Ginpahayag pa nga dugang nga pagpahaum ro andang gin-obra agud nga masiguro nga eowas , masaligan ag maging maayos ro biyahe it tanan nga mga pampasaherong baroto ag roro vessels.
Hugut man nga ginapatuman it PCG ro mandatory pre-departure inspection agud nga masiguro ro numero it mga pasahero nga nagasakay ag kompleto ro andang mga dokumento nga kinahangean.
Agud nga mabantayan ro pagpatuman it minimul health protocols, nagdeploy sigon sanda it mga tawuhan sa port ag nagapatigayon it inspeksyon sa mga saeakyang pandagat.
Dugang pa ni Salvino nga sa pagsueod it buean it Abril hay nag-umpisa eon nga bumuhos ro mga turista sa boracay nga kaabuan hay naghalin sa NCR.
Sa pihak nga parte, hugut man ro monitoring it PCG sa mga sea sports activity sa Boracay agud nga masiguro nga indi magsobra sa seating capacity ag obligadong pagsuksok it life jacket.
