KALIBO, Aklan—Sa pihak nga owa it direktang epekto ro paeaabuton nga bagyo nga pagatawgon nga “Betty” sa probinsiya it Aklan, apang ginpasiguro it Philippine Coast Guard ukon PCG-Aklan ro andang kahauman eabi eon sa pagbaskog it hangin ukon Habagat.
Suno kay Senior Chief Petty Officer Dominador Salvino, Deputy Chief for Operation it PCG Aklan nga nagapatigayon sanda makaron it shore patrol agud nga maabisuhan ro mga mangingisda ag mga residente nga maeapit sa coastal area nga maging mapagbantay.
Dugang pa nga nakadepende sa weather bulletin it PAGASA ro andang igapaguwa nga sea travel advisory.
Suno kay Salvino nga pagahugtan it mga Coast Guard personnel ro pag-eayag it mga baroto ag iba pang pampasaherong saeakyang pangdagat partikular ro nagabiyahe paagto it Romblon sa tiempo nga may gail warning samtang, automatic man ro pagkansela it clearance nga makabiyahe ro mga barko kon may storm signal halin sa port nga apektado it kaeain it paniempo hasta sa point of destination.
Sa pihak nga parte, padayun nga ginapadumdum it PCG ro mga biyahero ag mangingisda nga magtutok sa pinaka-ulihi nga daeagan it tiempo agud nga malikawan ro anumang aksidente sa kaeawran ag pagka-stranded.
Dugang pa nga naka-preposition man ro mga assets it PCG para insigidang ma-deploy sa oras nga makalista it pagbaha sa mga residential areas.
Sa pihak nga parte, engkaso nga magbaskog ro hanging habagat bangud sa epekto it bagyo, ginaeauman ro pagsaylo it biyahe it mga pampasaherong motorbanca halin sa Tabon paagto sa Tambisaan port vice versa.
