KALIBO, Aklan—Kapin sa 5,000 ka mga indibidwal eon ro na-cater it Philippine Coast Guard (PCG) Aklan nga bumyahe pinaagi sa mga barko ag roro vessel halin ko unang dominggo it presenteng buean it Hunyo.
Suno kay Senior Chief petty Officer Dominador Salvino, deputy commander it PCG Aklan nga raya hay ginakaeakipan it mga repatriated overseas filipino workers, authorized person outside residents, locally stranded individuals ag mga frontliners.
Ro kaabuan sigon nga mga pasahero hay halin sa Batangas nga naga-uli iya sa Western Visayas.
Antes nga makabyahe hay ginasigurado nanda nga may nagakaigo sandang dokumento nga ginabuytan kaparehas it health certificate halin sa munisipyo nga andang ginhalinan ag travel authority sa natungdan nga taeatapan it pulisya.
Nagaagi man sigon sanda sa rapid test antes taw-an it medical certificate. Samtang ro mga ginakabig nga APOR ag frontliners hay ginasikyaran ro mga raya it travel order agud nga masigurong legal ro andang panaw.
As much as possible suno kana hay kinahang-ean nga may koordinasyon ro kada indibidwal sa andang ginaulian nga lokal nga gobyerno agud nga inde eon sanda ma-hold sa pantalan pagpanaog sa barko. Inde sigon sanda pwede nga magsakay ukon magpanakayon sa pampublikong transportasyon agud nga malikawan ro pagkalhit it virus eabi eon ag sa mga high risk areas sanda naghaealin.
