KALIBO, Aklan—Padayun nga naka-heightened alert ro Philippine Coast Guard ukon PCG-Aklan bangud sa padayun nga pag-aeabutan it mga pasahero nga naga-uli sa probinsiya ag nagabakasyon sa isla it Boracay.
Suno kay Coast Guard Petty Officer 1st class Ambrocio it PCG-Aklan nga nagapabilin nga normal ukon manageable pa ro numero it mga pasahero nga naga-abot makaron sa Caticlan Jetty Port.
Nataeupangdan nga mas maabu ro mga biyahero nga natabok sa Boracay kaysa sa mga nakasakay sa roro vessel paagto sa kaiping nga mga pantalan it Mindoro ag Batangas.
Samtang, nakaplastar eon suno kana ro mga tawuhan it ahensiya sa mga pantalan nga nagabantay 24/7 agud nga masiguro ro kaeowasan ag seguridad it mga sumaeakay kun sa siin gina-check it mayad ro kaeowasan it mga saeakyang pang-eawod nga nagabiyahe.
Owa sigon it problema ro andang floating assets kamana man nga sigidas ro andang pagpatigayon it maritime patrol sa kaeawran nga sakop it Aklan.
Gina-usisa man ro manifesto agud nga malikawan ro overloading.
Nagtukod eon man sigon sanda it passenger assistance desk kabulig ro iba pang law enforcement agencies agud nga insigidang masabat ro anuman nga problema ukon pangutana it mga pasahero.
Samtang, gindugang pa ni Ambrocio nga hugut man nanda nga ginabantayan sa andang inspection ro mga makadueuda nga bagahe bangud sa mas ginpabaskog nga kampanya kontra sa illegal nga droga.
Laygay pa nana nga indi eon magdaea it mga mabahoe ag maabu nga bagahe nga makapa-delay sa andang pagbiyahe.
