Naka-full alert makaron ro bilog nga pwersa it Philippine Coast Guard (PCG) Aklan eabi eon gid sa mga pantalan sa probinsya it Aklan kasunod it nagahilapit nga Semana Santa.
Ginpahayag ni CG Ens. Eulugio Quinton III it PCG-Aklan nga doble ro ginapatigayon nanda nga preparasyon agud nga masiguro ro seguridad it mga pasahero makaron nga long weekend vacation.
Suno pa kana nga nagtukod eon sanda it malasakit health desk umpisa ko Marso 22 hasta it Abril 10 sa nagkaeain-eain nga pantalan partikular sa may bahin it Caticlan Jetty Port sa banwa it Malay.
Raya hay magatao it pag-asister sa mga biyahero nga makaangkon it problema samtang una sa andang pagbiyahe.
Ginpahayag dugang ni Quinton nga sigidas man ro andang pagmonitor sa mga baybayon partikular sa isla it Boracay.
Ginaeauman sigon nanda nga magabuhos ro numero it mga turista sa Isla it Boracay kasunod man it paghaeuga it mga sueundanan angot sa COVID-19 restrictions para sa mga biyahero.
Angot kara, nagapabilin nga ginasikyar it katapo it PCG-Aklan ro mga valid ID ag hotel booking it mga dumueuong turista ag bakasyonista nga magasueod sa Isla.
Sa pihak nga parte, posibleng magapangayo it dugang nga pwersa ro PCG-Aklan maghalin sa andang regional office sa siyudad it Iloilo para maging katuwang sa pagbantay sa seguridad it mga nagabiyahe sa kaeawran
