KALIBO, Aklan — Naka-full alert makaron ro bilog nga pwersa it Philippine Coast Guard (PCG) Aklan para sa nakahilapit nga Lenten Season ukon Semana Santa.
Sa interview it Bombo Radyo Kalibo kay Petty Officer 2nd Class (PO2) Norberto R. Tamagos it PCG-Aklan, doble ro ginapatigayon nanda makaron nga pag-duty agod nga masiguro ro seguridad it mga pasahero makaron nga bakasyon.
Ginpahayag man kara nga may mga dugang pa sanda nga tropa nga maga-abot sa probinsiya nga andang magiging katuwang sa pagbantay sa seguridad it mga nagabyahe sa kaeawran.
Ginpahayag dugang ni Tamagos nga sigidas man ro andang pagmonitor ag pagbantay sa mga beaches partikular sa isla it Boracay.
May kaangtanan man kara, nagpadumdom man si Tamagos sa mga beachgoers nga indi mag-adto sa madaeom, bantayan it mayad ro mga inunga ag likawan ro mag-inom antes nga pagpaligos sa dagat agod nga malikawan ro insidente it mga pagkaeumos.
