KALIBO, Aklan—Naka-heightened alert eon ro Philippine Coast Guard ukon PCG-Aklan bangud sa ginaeauman nga pagtama it maeain nga tiempo nga daea it bagyong Auring.
Sa pihak kara, ginpahayag ni Senior Chief Petty Officer Dominador Salvino, deputy commander it PCG-Aklan nga padayun ro biyahe it mga roro vessel halin sa Caticlan paagto sa Batangas ag Mindoro vice versa kamana man ro mga motorbanca pasueod ag paguwa it isla it Boracay bangud nga owa pa man it storm signal sa probinsiya.
Nataeupangdan man suno kana nga sangkiri eamang ro mga motorbanca nga nagabiyahe ag kaabuan sa mga pampasaherong fiber glass ferry boats hay nagpanago ukon nag-take-shelter eon bangud sa mabaskog nga hangin ag humbak.
Nagpaandam man ro PCG sa mga mangingisda ag mga naga-eayag sa dagat nga pabaskugon pa ro mga pagdahan.
Prepaerado eon suno kana ro andang mga deployable response groups ag quick response teams kamana man ro mga kagamitan engkaso nga kinahangeanon sanda sa evacuation ag rescue operations.
Target sigon nanda nga mapabilin ro “zero maritime incident” kada may kalamidad.
