KALIBO, Aklan—Preparado ro mga katapo it Philippine Coast Guard (PCG)-Aklan sa ginaeauman nga pagbuhos it mga pumueuyu sa baybayon kadungan sa selebrasyon it kapistahan ni San Juan de Bautista sa Hunyo 24.
Raya ro ginpahayag ni Sr. Chief Petty Officer Dominador Salvino, Deputy Station Commander for Operation it PCG-Aklan.
Suno kana nga naka alerto ro andang bilog nga linya ag magadeploy it mga tawuhan sa mga kaeabanan nga gina-agtunan it mga tawo agud nga insigidang makaresponde sa posibleng magatuhaw nga emerhensiya.
Ginaeauman sigon nanda ro pagdagsa it mga turista sa isla it Boracay ag iba pang lugar nga maeapit sa dagat.
Samtang, ginpaabot ni Salvino nga mangin madahan sa pagselebrar it kapistahan ni San Juan Bautista agud nga malikawan ro mga insidente it pagka-eumos ag iba pa.
Bastante sigon ro andang mga personnel kabulig ro coast guard auxilliary ag iba pang natungdan nga ahensiya it gobyerno agud nga magbantay sa mga beachgoers ag magapatigayon it first aid eabi eon sa mga drowning incident.
Nasayuran nga naga abot eon sa 8 ro sub-station it PCG sa Aklan.
