KALIBO, Aklan—Ginpahaum eon it Philippine Coast Guard (PCG)-Batanes ro andang mga deployable response groups ag quick response teams bilang preparasyon sa bagyong “Mawar” nga pagatawgon nga Betty sa oras nga magsueod raya sa Philippine Area of Responsibility.
Suno kay Coast Guard Capt. Atanacio Bagawe Jr., station commander PCG-Batanes nga makaron hay nagapabilin nga normal ro daeagan it paniempo idtu, apang kon mabatyagan eon ro epekto it bagyo hay insigidang igamandu ro “No sail policy”.
Nagpaguwa eon man sigon sanda it abiso sa mga mangingisda nga mag monitor sa weather updates kamana man sa mga residente nga prone sa landslides ag flashfloods.
Dugang pa ni Capt. Bagawe nga naka standby eon ro andang search and rescue teams ag haum para sa deployment sa mga lugar nga posibleng bahaon.
Sa pakikipag-angot sa iba pang natungdan nga ahensiya it gobyerno, ginaeauman nga igapatuman ro preemptive evacuations sa mga banwa nga maeapit sa baybayon it Batanes ag iba pang lugar samtang nagapaeapit ro bagyo.
