KALIBO, Aklan—Nakipagpueong ro Philippine Coast Guard (PCG) sub-station Dumaguit sa lokal nga opisyal it Batan agud nga ipaathag ro regulasyon it Maritime Industry Authority (MARINA).
Raya hay kasunod it pag-alburuto it mga pasahero matapos nga ma-stranded sa Dumaguit Port bangud sa kakueangan it nagabiyahe nga baroto patabok sa Batan Port.
Suno kay Petty Officer 1st Class Russel Relator it PCG sub-station Dumaguit nga daywa eon lang halin sa ap-at nga ferry boat ro nagabueos-bueos sa pagbiyahe, kun sa siin, limitado sa 17 nga pasahero ag ap-at nga motorsiklo ro pwedeng isakay.
Sa ginpatigayon sigon nga random inspection it andang taeatapan ko nobyembre 1, natukiban nga ro daywang ferry boat hay owa it nagakaigo nga safety documents halin sa MARINA rason nga ginpapundo sa pagbiyahe.
Mag-eowas kara, limitado man sa 75% ro passenger capacity it saeakyang pandagat ro ginapasugtan nga makasakay para sa seguridad it mga pasahero.
Dugang pa nga obligado man ro mga pasahero nga magsueat sa manifesto.
Samtang, gindugang pa ni Relator nga gin-umpisahan eon it MARINA ro pag – phase out it mga passenger vessel nga himo sa kahoy bangud sa ginaduso nga modernisasyon sa industriya para sa kaeowasan it mga pasahero.
Pagapasugtan eamang sigon nga magparehistro ro mga bag-ong baroto kon raya hay himo sa fiber glass ukon bakal.
Nauna eon nga ginaduso it Department of Transportation (DOTr) ro modernization sa mga barotong kahoy kasunod it pag-eugdang it baroto sa Iloilo – Guimaras Strait kun sa siin 31 nga katawo ro namatay.
