KALIBO,Aklan–Pito nga insidente it pagkaeumos ro nailista sa Western Visayas sa selebrasyon it kapistahan ni San Juan de Bautista ukon San Juan ko sabado , Hunyo 24 hasta ko Domingo Hunyo 25.
Suno kay Coast Guard District Western Visayas spokesperson Commander Jansen Benjamin, ro probinsiya it Iloilo hay nakalista it 3 insidente, tig sambilog halin sa Aklan, Negros Occidental, Capiz, ag Guimaras.
Sa Negros Occidental, nakita it mga otoridad ro eawas it 28 anyos nga si Joseph Ragasa, nga naeumos samtang nagapaligos sa suba sa Barangay Alicante sa banwa it E.B. Magalona./
Samtang sa Iloilo, nakilaea ro mga biktima nga sanday Rolando Arias Tañada, nga naeumos sa Barangay Namocon, Tigbauan, Iloilo; Freddie Divinagracia, 30 anyos nga naeumos sa Barangay Pantalan, Anilao.
Ro sambilog nga naeumos hay natabu ko domingo nga adlaw.
Sa aklan, patay ro sangka 57 anyos nga ginang nga nakilaea kay Matilde Delfin.
Gintinguhaan pa sigon nga maeowas it mga rescuers nga nakadeploy sa baybayon it Barangay Ochando sa New Washington ro biktima ag insigidang gindaea sa provincial hospital , apang gindeklarang dead on arrival it staff it ospital.
Sa pihak nga parte, sa Nueva Valencia, Guimaras, patay si Jomar Soriano, 40 anyos matapos nga magpaligos sa baybayon it Sitio Talisay, Barangay Poblacion, kun sa siin ginasugid nga ginbiling rason nga owa eon nakabutwa halin sa tubi.
Sa Pilar, Capiz, nakita man it mga otoridad ro patay nga eawas ni Joemar Ocayo.
Ginasugid nga nag-eumpat raya sa barotong ginasakyan ag napas-eawan eon nga makabutwa.
Inabot man it haeos daywang oras antes nga narekober ro anang eawas.
Samtang , ginpahayag ni commander Benjamin nga bangud sa paghaeuga sa mga ginpatuman nga covid 19 restrictions rason nga dumagsa ro mga beachgoers.
Nasayuran nga ko nagtaliwan nga dag-on hay nakalista eamang it sambilog nga insidente it pagka-eumos