KALIBO, Aklan—Naka-alerto ro Philippine Coast Guard ukon PCG Western Visayas sa kapistahan ni San Juan de Bautista makaron nga Hunyo 24 nga mas kilaea sa tawag nga San Juan.
Suno kay Comdr. Jansen Benjamin, tagapaghambae it PCG Western Visayas nga ginaeauman ro pagbuhos it mga beachgoers rason nga naka-monitor ro andang pwersa sa sitwasyon sa mga coastal areas.
Ginmanduan sigon ro tanan nga mga coastguard stations sa bilog nga rehiyon nga magpatigayon it information education campaign kamana man nga nag-inspection sa mga resorts angot sa andang compliance sa pag angkon it life guards ag ro pag-edukar sa andang mga bisita sa kahimtangan it baybay nga nasakupan.
Magapatigayon man suno kana ro adang mga personnel it baywatch ag seaborne patrol.
Nakikipag-angot man sigon sanda sa mga natungdan nga Municipal Disaster Risk Reduction and Management Office.
Sa pihak nga parte, preparado suno kana ro andang mga floating assets partikular ro daywang search and rescue vessels nga makasarang nga magresponde eagi sa posibleng matabu nga maritime incidents.
Sa Aklan, ginpahayag ni Benjamin nga haum ro mga personnel it kada substations partikular sa isla it Boracay.
Pinaagi sa augmentation it coastguard auxiliaries ag iba pang government responders, magadeploy sanda it dugang nga mga teams nga maga-focus sa pagbantay sa coastal areas, eabi eon sa mga lugar nga ginadagsa it maabu nga beachgoers.
