KALIBO, Aklan—Ginpaabot it Philippine Charity Sweepstakes Office (PCSO)-Aklan nga padayun sanda nga nagatau it medical services sa mga kabarangayan nga nagakinahangean it bulig nga mga bueong para sa andang mga pumueuyu sa tunga it ginapangatubang nga pandemya daea it COVID 19.
Suno kay John Martin Alipao, financial management officer it PCSO-Aklan nga kan-o eamang hay mismo nanda nga General Manager nga si Royina Garma ro nagturn-over it kinarton nga mga bueong nga nagabalor ro kada isaea it 20,000 pesos.
Nakabaton sigon ro 16 nga barangay it Kalibo it tig sangka box it bueong matapos nga aprubahan ro andang request.
Apang ro tatlong barangay sa Nabas nga nakabaton it kapareho nga bulig hay sa idaeum it andang medical access program.
Raya hay ginaeakipan it banwa it union, laserna ag tagurorok.
Gindugang pa kara sa mga LGUs nga may una man nga online application para sa medical assistance.
Gindugang pa ni Alipao nga sa makaron hay sigidas ro andang medical assistance program sa mga pasyente nga kueang ro gastos sa pagpa-ospital.
Ginlaygayan nana ro mga nagakinahangean it bulig nga magpaeapit eang sa social service department it ospital nga gindaehan para sa assessment.
Angot kara, nag apela imaw sa publiko sa padayon nga suporta sa mga pahampang it PCSO.
Sa pihak nga parte, gindugang pa ni alipao nga posibleng sa makaron nga buean it hulyo hay may lehitimo eon nga operator it Small town lottery ukon STL sa Aklan.
Raya hay matapos nga aprubahan ro aplikasyon it operator it andang main office, apang may pila pa nga mga papeles nga gina asikaso.
