KALIBO, Aklan—Nagapahaom eun ro Philippine Charity Sweepstakes Office (PCSO) para sa pagbalik-operasyon it lotto outlets, pilang buean matapos rayang magsarado bangud coronavirus disease ukon COVID-19 pandemic.
Suno kay Jhon Martin Alipao it PCSO-Aklan nakataeana nga pagabuksan sa petsa 4 it Agosto ro pilang ka mga lotto outlet sa probinsiya apang limitado ro mga hampang.
Sa makarun hay nagapreparar eun sanda para sa pagtuman it mga minimum health standards nga kinahangean sa pagbukas it mga outlet.
Kaibahan sa mga igapatuman hay ro pagsuksok it face mask ag ro pagpatuman it physical distancing sa pagpila sa mga lotto outlet.
Kinahangean man nga magbutang it screen sa tunga it ahente it lotto outlet ag manugtaya.
Plano man karang igabawae nga magsueod ro mga lotto agent nga 21 anyos panaba ag 60 anyos pataas para masunod ro health standards it gobyerno.
Samtang para man sa mga advanced ticket nga naabutan it lockdown, plano it PCSO nga magpatigayon it “special draw” oras magbukas eun ro mga lotto outlet.
Sa makarun hay ginaplantsa eun nanda ro ibang pagsinueondan agud masigurong euwas ro mga manugtaya ag ro mga nagatrabaho sa mga lotto outlet.
Madumduman nga ginpasarado it PCSO ro operasyon it mga lotto outlet ko Marso 18 kat ginpaidaeum sa lockdown ro bilog nga Luzon bangud sa pandemya.
