KALIBO, Aklan—Nagpadaea it sueat kay Provincial Health Officer I Dr. Leslie Ann Luces ro taeatapan it Person’s with Disability Affairs Office ukon PDAO Aklan.
Suno kay Randy Rebaldo it PDAO Aklan nga ro kaungdan it andang sueat hay agud nga magpangayo it prayoridad ag igtaeupangod ro mga Person’s with Disability ukon PWD’s agud nga makabatun it bakuna kontra COVID-19.
Nagakabakaea man sigon ro mga PWD’s bangud nga ro iba kanda kara hay makabig man nga frontliners ag breadwinner it pamilya apang owa it nagakaigo nga proteksyon kontra sa deadly virus.
Dugang pa kara nga nagpahayag man it pag-suporta si Dr. Luces sa andang sueat ag naghambae nga anang pagataw-an it atensyon ro nasambitan nga sueat kung makabalik eun raya sa banwa it Kalibo.
Sa makarun hay presente pa rayang idto sa Isla it Boracay.
Nasayuran nga ro banwa it Balete ag Libacao hay nagtao it prayoridad sa mga PWD’s sa andang ginpatigayon nga vaccination roll out.
