KALIBO, Aklan—Nagpatigayun it orientation program ro Person with Disability Affairs Office (PDAO)-Aklan kaibahan ro pamunuan it Philippine Health Insurance Corporation (Philhealth) para talakayon ro igatao nga benepisyo para sa mga indibidwal nga may kapansanan.
Suno kay PDAO-Aklan Head Randy Rebaldo, maidid nanda nga gintalakay ro kaundan it Republic Act 11228.
Raya hay bangud nga may mandu eon ro gobyerno nasyonal nga itao eon sa mga Person with Disability (PWD) ro benepisyo para sa Philhealth program.
Ginpahayag ni Rebaldo nga may responsibilidad ro kada lokal nga gobyerno nga magpatigayun it online registration sa Department of Health (DOH) para sa mga PWD sa andang nasakupan.
Daywang ka mga munisipalidad pa eamang sigon ro nakakumpleto kara partikular ro banwa it Balete ag Libacao.
Ro ibang banwa sigon hay padayun pa sa pagproseso sa andang masterlist para sa pagahimuon nga online registration.
Aminado man si Rebaldo nga maabu pa nga kakueangan ro dapat nga ayuson.
Dapat sigon nga tinguhaan it kada LGU nga makasueod sa sistema ro mga PWD kamana man nga owa it age limit ro Philhealth insurance sa mga raya.
