KALIBO, Aklan — Agud nga malikawan ro mga drug activities sa mga presuhan, nagpatigayon it surprise inspections ro mga katapo it Philippine Drug Enforcement Agency (PDEA)-6 ag Bureau of Jail Management and Penology (BJMP)-6 sa jail premises it BJMP-Aklan sa Brgy. Nalook, Kalibo, Aklan.
Owa man it nabo-oe nga baril, droga ukon iba pang ginabawae nga mga items sa sueod it mga selda it parehong eaeaki ag babaye.
Ro mga inmates hay ginpaidaeum man sa body search antes nga ginkasa ro Oplan Galugad .
Sa makaron ro BJMP-Aklan hay may inmates nga naga-abot sa 459 .
Haeos dyes porsiyento sa mga raya ukon 47 nga presu ag siyam nga jail personnel hay ginpaidaeum sa random drug test nga puro man nag-negatibo.
Nasayuran nga kan-o eamang hay gin-renew it daywang ahensiya it gobyerno ro andang partnership pinaagi sa pagpirma sa Memorandum of Agreement (MOA) agud nga eubusan nga matapna ro pagbaealigyaan it droga sa sueod it mga presuhan.
