KALIBO, Aklan–Nagapabilin ro hugut nga monitoring ag pagbantay it Provincial Drug Enforcement Unit (PDEU)-Aklan sa daeagan it iligal nga droga sa bilog nga probinsya.
Tuyo kara nga mapabilin ro pagiging drug free it probinsya.
Ginpahayag ni Police Lieutenant Colonel Frenzy Andrade, Head it PDEU-Aklan nga amat-amat eon nga nagabalik ro pagbaealigyaan it droga matapos ro ginhimo nga paghaeuga sa mga restriction.
Partikular ro pagbukas it maabu nga mga negosyo kapareho it bar kung siin ginaeauman nga maga-abu eon man ro kliyente it mga drug pusher.
Maskin ro mga estudyante suno kana hay amat-amat eon nga nagabalik sa in-person classes rason nga kinahang-ean ro maidid nga pag-monitor it mga otoridad para masiguro nga euwas sa droga ro mga pamatan-on.
Madumduman nga daywang ka mga drug personality ro magkasunod nga nadakpan sa ginpatigayun nga drug buy-bust operation sa sueod eamang it sang dominggo.
Ro mga natungdan nga indibidwal suno kana hay mabuhay eon nanda nga gina-imbestigahan ag gina-monitor antes ginpatigayun ro operasyon.
