Kalibo Aklan ———Kasunod it pagka-aresto sa high value target nga nakumpiskahan it masobra sa 4 milyon pesos nga balor it shabu sa kaiping nga probinsiya it Capiz, ginpahayag ni P/Lt. Col. Frenzy Andrade it Provincial Drug Enforcement Unit ukon PDEU-Aklan nga nagapabilin nga owa sanda it may na-monitor nga mabahoe nga drug personalities sa probinsiya .
Suno kana nga kaeabanan sa mga supply nga nagasueod sa Aklan hay halin sa mga kaiping nga probinsiya sa Western Visayas.
Mag-eowas kara, nadakpan ag nakakulong eon sigon ro mga ginakabig nga mabahoe nga supplier it iligal nga droga partikular sa isla it Boracay.
Samtang, aminado si Lt. Col. Andrade nga dismayado sanda sa ginapatuman it gobyerno nga plea bargaining sa drug cases bangud nga kaabuan sa andang mga uman nga nadakpan hay nag-avail it nasambit nga programa.
