KALIBO, Aklan–Ginpasiguro it Provincial Drug Enforcement Unit (PDEU)-Aklan nga sigidas ro andang monitoring angot sa mga personalidad nga padayun nga nagaduso it iligal nga droga.
Aminado si Police Lieutenant Colonel Frenzy Andrade, Head it PDEU-Aklan nga maabu gihapon ro eakot ag uman nga nagaduso it droga sa bilog nga probinsya.
Bangud kara, mas pa sigon nanda nga ginpabaskog ro andang pagbantay agud nga maprotektahan ro mga pumueoyo eabi eon ro mga pamatan-on halin sa maeain nga epekto it droga.
Maskin ro mga drug cleared barangay suno kana hay padayun nanda nga ginamonitor kaeakip ro mga drug surrenderee para masiguro nga indi eon magbalik sa dating bisyo.
Nasayuran nga sambilog ro pagtapna sa pagkalhit it iligal nga droga sa gintutukan it administrasyon ni Pangueong Rodrigo Duterte halin kat magpungko raya sa pwesto ko 2016.
Raya sigon ro nagtueod sa maabu nga mga drug addict ag pusher nga magsurrender bangud sa kahadlok nga makulong.
