KALIBO, Aklan—Nagpagguwa eon it final damage assessment ro Provincial Disaster Risk Reduction and Manage Council (PDRRMC)-Aklan matapos ro pagpanaeasa it bagyong Odette.
Suno kay Mr. Galo Ibardolasa, Action man it PDRRMC-Aklan nga halin sa 17 nga mga kabanwahanan it probinsya, nakalista sanda it kapin sa 12,140 nga pamilyang nagbakwit ukon katumbas it 44,445 nga mga indibidwal.
Ro nasambit nga numero suno kana hay nagapamatuod eamang nga mataas eon ro lebel it disaster preparedness it mga Aklanon kada tyempo it kalamidad rason nga insigida sandang nagabakwit kamana man nga ro mga lokal nga gobyerno hay nagapatigayun it preemptive evacuation eabi eon sa mga low-lying areas.
Angot kara, nakalista man ro taeatapan it 392 nga partially damage nga mga panimaeay ag 21 nga totally damage.
Samtang, ro naging kahalitan sa sektor it agrikultura hay naga-abot sa P6,920,745.
Ginpaathag ni Ibardolasa nga ro imprastraktura ro nakalista it pinakamabahoe nga kahalitan matapos nga makaangkon it kasamaran ro porsyon it seawall sa banwa it New Washington ag Buruanga nga naga-abot sa kabilugang P16,633 600.
Ro bilog nga Western Visayas hay kaibahan sa an-om ka mga rehiyon nga ginpaidaeom ni Pangueong Rodrigo Duterte sa state of calamity matapos ro pagtama it bagyong Odette.
