KALIBO, Aklan—Ginrekomenda it Provincial Disaster Risk Reduction Management Council ukon PDRRMC sa gobyerno probinsyal it Antique nga ipadaeom ro bilog nga probinsya sa state of calamity bangud sa padayon nga epekto it El Niño.
Suno kay PDRRMC Antique head Mr. Broderick Gayona-Train, naabot eon nanda ro criteria para madeklara nga state of calamity ro sangka probinsya rason nga insigida sanda nga nagconvene ag nakahimo it resolusyon nga gilayon man nga gin-endorso sa Sangguniang Panlalawigan it Antique.
Ginpaathag ni Train nga nauna eon nga nagdeklara it state of calamity ro lokal nga gobyerno it Anini-y, Sibalom ag Lawaan bangud sa nakit-an nga halit it tuman kainit nga tyempo partikular sa sektor it agrikultura.
Ginaeauman nga sa masunod nga mga inadlaw sa igapatigayon nga session it Sangguniang Panlalawigan hay matalakay ro andang resolusyon agud nga mataw-an it nagakaigong solusyon ro ginapangatubang nga problema tuga it El Niño ag maayudahan ro mga apektadong sektor.
