KALIBO, Aklan—Naka heightened alert eon ro Provincial Disaster Risk Reduction Management Council (PDRRMC) Antique para sa mas madasig ag pinabaskog nga emergency response sa nakataeana nga pag-umpisa it dag-unan nga regional sporting events kon sa siin ro Department of Education (DepEd) ag probinsya it Antique ro host province makaron nga dag-on para sa Western Visayas Regional Athletic Association (WVRAA) Meet 2025.
Suno kay PDRRMC Antique head Broderick Gayuna-Train, haom eon ro andang taeatapan kaibahan ro iba pang mga emergency and rescue volunteers sa pagprovide it assistance engkasong may matabo nga emerhensiya sa kasagsagsan it pagpatigayon it mga hampang halin Marso 1 hasta it 8, 2025.
Sa sueod it sang dominggo nga sporting competition hay may nakataeana nga emergency response personnel agud nga insigidang mabuligan ro mga atleta nga magakinahang-ean it andang alalay.
May maga-augment man suno kana nga MDRRMO’s maghalin sa probinsya it Aklan ag Passi City agud nga masiguradong bastante ro mga emergency personnel sa tanan nga venue it mga hampang.
Sa makaron suno kana hay ginahueat eon lang ro pormal nga pag-umpisa it mga hampang kon sa siin ro opening ceremony hay nakataeana pa sa March 2, 2025, alas-4:00 sa hapon.
Nasayuran nga nagaabot sa masobra 5,394 ro kabilugan nga delegasyon nga ginakaeakipan it mga atleta, coaches, chaperoons, technical officials ag iba pa makaron nga WVRAA Meet 2025 sa probinsya it Antique.
