Nagapabilin nga nakamonitor 24/7 ro Provincial Disaster Risk Reduction Management Office ukon PDRRMO sa presenteng sitwasyon it panyempo sa bilog nga probinsya it Aklan.
Suno kay Mr. Jeffrey Jizmundo it PDRRMO Aklan nga minimal pa eamang ro epekto it gale warning bangud nga uwa it direkta nga epekto sa probinsya ro Bagyong Betty.
Apang, mas pa nana nga hatakon ro habagat nga raya ro rason sa likod it mga isolated rainshowers nga naeksperyensyahan halin pa kahapon nga adlaw.
Angot kara, padayon sanda nga nagapadumdom sa publiko nga siguraduhon ro kaeowasan it kaugalingon ag bilog nga pamilya.
Kaparehas kara nga may weather disturbance hay maging mapagmatyag sa daeagan it panyempo.
Siguraduhon nga may nakarehistro nga emergency hotlines sa andang mga cellphone agud nga insigidang makapangayo it bulig kon kinahang-ean it emergency rescue personnel.
