KALIBO, Aklan—Ginapahauman eon it Provincial Disaster Risk Reduction Management Office it Aklan ro tyempo it tig’oeuean maskin nga uwa pa raya opisyal nga gindeklara.
Paathag ni Manuel Jeffrey Jizmundo ro Officer in Charge it PDRRMO – Aklan nga Mayo hasta Setyembre gid man sigon ro tyempo it tinguean nga may above normal nga rainfall.
Base man sa PAGASA nga May ag June ro transition period, ag maumpisa ro La Niña sa katapusan it June ukon July.
Ginapreparahan sigon nanda raya kun siin nga sa katapusan it Mayo hay may hiwaton nga PDRRM Council Meeting ag talakayon ro tanan nga preparasyon it tanan nga taeatapan it tanan nga banwa.
Kaparte kara ro pagmonitor sa daeagan it tyempo pati man ro heat index ag padayon ro andang pagpost sa andang Facebook page.
Nagatao man sanda it weather update ag preparedness measures, ag haom man ro andang mga rescue equipments pati man ro andang rescue personnel bangud nga mabahoe gid ro tsansa it pagbaha kun naga’uean.
Ginamintinar man nanda ro 500 food packs nga buffer sa PSWDO agud haom ingkaso nga may mga kalamidad ag ro identified evacuation center sigon hay ABL sports complex ag Aklan Training Center.
Pati man sigon sa mga kabanwahanan hay nagapreparar parte sa nasambitan nga mga kalamidad.
Pahayag ni Jizmundo sa katawhan nga magsunod sa mga sugo it mga rescuers eabi eun kun ginapa’evacuate.
Importante man suno kana ro kooperasyon it mga pumueyo sa komunidad ngani nga kinahnag’ean nga sundon ro mga padumdom ag giya it mga PDRRMO ukon MDRRMOs.
Prayoridad man sigon nanda ro mga mas nagakinahang’ean sa panahon it kalamidad.
