KALIBO, Aklan—Mabahoe ro naging pagpasaeamat it Aklan Provincial Disaster Risk Reduction and Management Office ukon PDRRMO bangud nga owa masyadong naapektuhan it bagyong dante ro probinsiya.
Suno kay Galo Ibardolasa, PDRRMO head nga antes ro pagtama it bagyo hay naka-alerto eon ro andang mga tawuhan kamana man ro mga kagamitan para sa rescue operation.
Sa kasagsagan sigon it bagyo hay hugut ro andang pag monitor sa sitwasyon sa bilog nga probinsiya nga nakaexperiensiya it mabaskog nga bubu it uean.
Madumduman nga ro aklan hay ginpaidaeum hasta sa storm signal 2 ag ginbalik ko ulihi sa signal no. 1.
Gindugang pa ni ibardolasa nga ro mga naexperiensiyahan nga pagtaas it tubi sa mga karsadahon hay tuga it uean.
Ro Aklan river suno kana hay nag-eubog eamang apang normal ro lebel it tubi-baha.
May nai-report man nga soil erosion sa parte it batan public cemetery.
Sa pihak kara, ginmanduan gihapon ni ibardolasa ro mga barangay disaster risk reduction and management committee nga padayun nga magbantay eabi eon sa mga lugar nga may nagakatabu nga land slide ukon pagkahugos it eugta.
Samtang, uman nga nagpaabot it abiso si ibardolasa sa publiko nga kon mahina ro bagyo , ro dapat nga bantayan hay ro baha apang kon mabaskog hay ro kabaskog it hangin.
