KALIBO, Aklan—Magapatigayon ro Provincial Disaster Risk Reduction and Management Office (PDRRMO)-Aklan it earthquake drill sa maabot nga Nobyembre 14 sa provincial capitol agud nga eubusan nga ma-orient ro mga pumueuyu sa mga bagay nga dapat nga obrahon sa oras it kalamidad.
Suno kay PDRRMO Officer Galo Ibardolasa nga ginpueong nanda ro mga head it nagkaeain-eain nga departamento ag opisina it provincial capitol agud nga istoryahan ro mga dapat nga obrahon.
Ro drill hay bilang pagsunod sa memorandum it National Disaster Risk Reduction and Management Council (NDRRMC) sa pagpatigayon it simultaneous earthquake drill sa 4th quarter it makaron nga dag-on.
Gindugang pa ni Ibardolasa nga dikara ma-testingan ag ma-apply it mga gin-train nanda nga mga first aiders it nagkaeain-eain nga departamento ag opisina it kapitolyo ro andang natun-an sa mga dapat nga obrahon sa pagresponde hasta nga madaea ro mga biktima sa gintaeana nanda nga safe evacuation area sa prente it capitol sa open basketball court.
Nasayuran nga ro pilot area para sa 4th quarter national simultaneous earth quake drill it Regional Disaster Risk Reduction and Management Office hay sa Guimaras.
Samtang, gin-engganyo man ni Ibardolasa ro iba pang mga banwa, barangay ag eskwelahan nga sigidas nga magpatigayon it drill.
Nag-apela man imaw nga seryosohon ro mga drills agud nga engkaso nga maexperiensiyahan ro actual nga linog hay indi maga-panic.
Samtang, gindugang ni Ibardolasa nga ulihi nga naghueag ro west panay fault nga nagahalin sa banwa it Ibajay hasta sa kabukiran it Madalag ag Libacao nga ro punta hay sa Anini-y, Antique hay ko Hunyo it 1990s, kun sa siin nakaangkon it kasamaran ro Kalibo Cathedral bangud sa naexperiensiyahan nga 6.9 magnitude nga pag-uyog.
