KALIBO, Aklan—Ginapatuman eon it lokal nga gobyerno it Aklan ro mga tikang agud nga mapahauman ag masabat ro epekto it El Niño nga presente eon nga nagapanaeasa sa ibang parte it nasyon.
Suno kay MJ Jizmundo it Provincial Disaster Risk Reduction and Management Office ukon PDRRMO Aklan nga limang sektor ro andang ginatutukan agud nga mapahagan-hagan ro epekto it tigmaeaea sa mga pumueuyu.
Nagapanguna sigon kara ro tubi kun sa siin ginapasiguro nga makaangkon it supply it mainom nga tubi ag patubi sa mga ueumhan pinaagi sa mga conservation measures ukon pagtipid it tubi ag iba pa.
Sa pihak kara, mabahoe sigon ro andang pagpasaeamat bangud nga naka-eksperyensiya pa ro aklan it near normal sa rainfall kun sa siin hay may mga pag-uean-uean pa tuga it epekto it amihan.
Ikaywa hay ro food security kon sa siin pagasiguraduhon ro dere-deretso nga supply ag normal nga presyo it isda, tinuea ag iba pang pagkaon.
Kaeabanan sigon nga nagakatabu sa tiempo it grabeng init hay ro fish kill, pagnaba it ani it mga agricultural crops kamana man sa sektor it enerhiya kun sa siin ginaduso man nanda ro energy conservation.
Ika-ap-at ro sektor it ikamayad nga eawas kun sa siin hugut nga gina-monitor ro mga baeatian nga may kaangtanan sa El Niño.
Samtang, padayun man sigon nanda nga ginabantayan makaron ro mga nagakatabu nga grass fire nga posibleng magtuga it sunog.
Nagapati man si Jizmundo nga owa pa it baeasihan ro aklan agud nga magdeklara it state of calamity bangud sa masyadong manaba ro mga naireport nga mga kahalitan.
Nakikipag-angot man sigon sanda sa tanan nga ahensiya it gobyerno para sa madasig nga reporting ag insigidang aksyon kon may matabu nga negatibong epekto it El Niño.
