KALIBO, Aklan—Presente pa nga nagahueat it damage assessment report ro Provincial Disaster Risk Reduction and Management Office ukon PDRRMO sa naexperiensiyahan nga pagbaha ko Lunes nga adlaw, Nobyembre 20 sa pilang banwa sa probinsiya it Aklan.
Suno kay Manuel Jayfree Jizmundo it PDRRMO-Aklan nga sa makaron nga mga pang-orason hay owa pa it nabaton ro andang taeatapan nga report angot sa kahalitan nga tuga it pagbaha bangud sa owa it pundo nga pag-ilinuean nga daea it shearline.
Apang nagpa-abiso eon suno kana ro MDRRMO-Batan nga owa man it major damage sa andang nasakupan.
Ginahueat pa sigon nanda ro report maghalin sa mga banwa it Balete ag Altavas.
Dugang pa ni Jizmundo nga owa man it naka-abot kanda nga report angot sa mga posibleng casualty ukon may namatay, naninahan ukon na-missing tuga it insidente.
Madumduman nga base sa ginpaguwa nga report it Office of Civil Defense, nag-abot sa 37 nga mga barangay sa Western Visayas ro apektado it mga pagbaha.
Sa nasambit nga numero, 14 nga barangay ro naapektuhan sa Aklan ag 31 sa Capiz.
